Manifest de Sant Pier

Consideraa la crisi econòmica enternacionala qu’a endirectament desclanchat ‘na bercha en nombrosas associacions culturalas, e après la crisi morala e de confiança d’importantas associacions del Piemont, decò occitanas, las associacions culturalas Soulestrelh e Ousitanio Vivo an propongut l’assemblea joncha de Sant Pier del 15 de novembre del 2014.

1) Embè l’assemblea de Sant Pier del 15 de novembre del 2014 las associacions culturalas Soulestrelh e Ousitanio Vivo decidon de crear una nòva associacion, mandaa Lou Soulestrei, ente fito intrarèn lhi respectius jornals (lo quadrimestral Lou Temp Nouvel e lo mensil Ousitanio Vivo), las respectivas resorças umanas, publicacions, patrimònis financiaris e materials.

2) L’associacion culturala Lou Soulestrei vòl gardar e promòure l’identitat de la minorança linguística occitana en Italia, embè particulara atencion a la lenga, a la cultura materiala e a las tradiccions, a la literatura, a las expressions de la musica e de la dança, a las nòvas creaccions e a las nòvas formas de comunicacion telematica. Vòl decò encoratjar, a travérs lhi siei instruments d’informacion, tot esvilup social, demografic, econòmic e politic des Valadas Occitanas en Italia.

3) L’associacion culturala Lou Soulestrei se reconeis part integranta de l’espaci linguístic e cultural de tot lo territòri occitan, da las Alps ai Pirenèus e a l’Atlantic.

4) Lo simbol de l’associacion Lou Soulestrei es la solèta crotz occitana a 12 ponchas.

5) L’associacion Lou Soulestrei reconeis coma grafias per escriure la lenga occitana mec aquela de l’Escolo dóu Po (o Concordaa), sustot per lhi estudis e las expressions literarias liats a las diferèntas variantas del pòst adobraas en las Valadas Occitanas, e aquela Classica (o Normalizaa), per lhi escrichs qu’an pas caracter local.

6) L’associacion Lou Soulestrei se vòl proponer coma referiment per far mai agregar nombrosas realtats culturalas des Valadas Occitanas, que, bela que extraordinariament vitalas, an vist e pagat en lor istòria sectarismes, personalismes e esterlas contrapausicions. Pr’aquò, tot en gardant lhi principis de lhi articles precedents, dona votz a una completa pluralitat de convincions politicas, religiosas e ideològicas.